Ümumi Keyfiyyəti İdarəetmə (Total Quality Management, TQM) bütün proseslərin, məhsulların və xidmətlərin hamının iştirakı ilə inkişaf etdirilməsi, müştəri məmnunluğunun artırılması məqsədilə təşkilatın əldə etdiyi nəticələrin davamlı yaxşılaşdırılmasına əsaslanan idarəetmə sistemidir.

TQM ilk dəfə Henry Ford tərəfindən istifadə edilmişdir. H.Ford 1926-cı ildə nəşr etdirdiyi My Life and Work (Həyatım və İşim) adlı kitabında TQM-i yeni bir idarəetmə modeli olaraq irəli sürmüşdür.

1950-ci illərdə U.E.Deminq TQM-i inkişaf etdirmiş və bu sistem yaponlar tərəfindən mənimsənilmişdir.
Yapon idarəçiləri TQM-i bütün fəaliyyət sahələrində yayaraq insanların bu mövzuda marifləndirilməsini təmin etmiş və bununla da məhsul və xidmətlərin keyfiyyətinin yüksəldilməsinə nail olmuşlar. 

Qeyd etmək lazımdır ki, TQM müştəri gözləntilərini nəzərə alan, işçilərin qrup halında çalışmasına yönəlik, bütün proseslərin nəzərdən keçirilməsini və təkmilləşdirilməsini təmin edən bir idarəetmə fəlsəfəsidir. Bu sistem hər müəssisədə fərqli metodlarla həyata keçirilə bilər.

TQM-i xarakterizə edən əsas elementlər aşağıdakılardır:

• Sistemlər barədə biliklər, sistemli yanaşma və optimallaşdırma;
• Statistik nəzəriyyənin əsasları və dəyişiklik haqqında biliklər;
• Dərketmə nəzəriyyəsinin əsasları;
• Psixologiyanın əsasları.

TQM-in tətbiqi təcrübəsi bu sistemin 5 əsas tərkib elementlərini ayırmağa imkan verir:

• Sənədləşdirilmiş keyfiyyət sisteminin qurulması; 
• Təchizatçılarla qarşılıqlı əlaqə;
• İstehlakçılarla qarşılıqlı əlaqə;
• Keyfiyyətin yaxşılaşdırılmasının stimullaşdırılması;
• Keyfiyyət sahəsində təlimatlandırılma.

TQM üçün müştəri məmnuniyyəti qazancdan əvvəl gəlir, bu sistemdə insan, proses, müştəri və davamlı inkişaf 4 əsas ünsürdür və onlar bir-biri ilə qarşılıqlı əlaqə halındadır.
Hər bir təşkilatın dəyişmə səbəbləri və əldə etmək istədiyi nəticələr fərqli olduğundan TQM-in həcmi, tətbiq olunacaq metodlar və ayrılacaq resurslar da fərqli ola bilər.